වේළුපිල්ලේ ප්‍රභාකරන් ඇතුළු කොටිනායකයන් ගේ ජිවිතය සොයා ගිය ගමන් මග වෙනස් කල අවසන් පැය විසි දෙක.......
ඉරණම් ගමන වෙනස් කල දිනය ඇරඹෙයි...
වර්ෂ දෙදහස් එක නොවැම්බර් දහනව වන දින තිස්වැනි පැයෙන් ඇරඹුම.
වේලාව අළුයම හයේ පැය සටහන් වෙද්දී කපිතාන් උදේෂ් රත්නායක සිය කන්ඩායම ඔහු සමිපයට කැඳවන විටත් පෙර දින ගමන අරඹන විට පැවති වර්ෂාව ඒ ආකරයෙන්ම ඇද හැලෙමින් තිබුනි. ඉඳ හිට පලාතම ආලෝකමත් කරමින් පිපිරී යන අකුණු සැරයට පෙර පැමිනෙන නිල් පැහැති ආලෝකයෙන් ඉදිරියෙන් දෙගුන වූ බරක් සහිතව මදක් ඉදිරියට බරව ගමන් ගන්නා සගයන්ගේ රුව පෙනි නොපෙනී යන්නේය. මෙම වැහි අඳුර මෙන්ම එක දිගට ඇද හැලෙන වර්ෂාව නිසාවෙන් ගලා යන ජලයෙන් පොලොව තෙත බරිතව එරෙන ස්වභාවයක් ගත්තද ඇද වැටෙන වර්ෂාව මත පොලොවේ සටහන් වන පාද සළකුණු ඒ සැනින් තදින් වැටෙනා වර්ෂා ජලය මත සැඟව යන්නේය.
1625 පැය වනවිට මොවුන් අත හැර දමන ලද හමුදා කඳවුරක් වෙත ලඟා වෙන්නට විය. මෙය නොනවතින රැල්ල ත්‍රස්ථවාදින්ගේ ආක්‍රමණික මෙහෙයුම් මාලාව තෙක් ශ්‍රී ලංකා ආරක්ෂක හමුදාව විසින් පවත්වාගෙන යන ලද කඳවුරක් වූ අතර, එම ප්‍රහාර මාලාවේදි සිදුවූ වූ ජිවිත දේපල හානි සමග අපගේ ආරක්ෂක අංශ සාමාජිකයින්ගේ රුහිරයෙන් තෙත්වුන එහි මැකියමින් දිරාපත්වෙමින් තිබුන හමුදා ආයිත්තම් අතර බංකරයක දිරායමින් තිබුන ගිලන් මැස්සක් දකින්නට ගුණසේකර විසින් සිය පාදයෙහි එයට තට්ටුවක් දමමින් එය මතින් මෑත්වූ අතර දිරාපත්වූ වැටවල් අතර තැන තැන දමා තිබුන බාබ් වයර් (concetina role ) වසාගෙන කෑලෑවැල් වැසී පැතිර තිබූ නිසාවෙන් ඒවා වෙනස් නොකර එහි වන හිඩැස් අතරින් ඉදිරියට ඇදෙද්දී මදක් විමසිලිමත් වීමට කපිතාන් උශේශ රත්නායක සිය සගයන් හට පැවසන්න විය. ඒ ඔවුන්ගේ සැලසුම සකස් කිරීමේදී එයට අනුව මේ අවට ගුවන් හමුදාවෙන් දමන ලද බිම් වෙඩි කෙතක් පිළිබඳව වූ සඳහන හා එයට ආසන්නයේ කිලෝ මීටර දෙකක් පමණ නැගෙනහිරින් වන සිවිල් වැසියන් වාසය කරන පෙරියමඩු නම් ගමක් හා මිටර් පන්සියයක් දෙපසින් පිහිටි ත්‍රස්ථවාදින්ගේ කඳවුරක් ගැන වූ බුද්ධි අංශ තොරතුරු නිසාවෙනි.මොවුන් මේ ගමන් කරන්නේ ඒ හිඩැස,අතරිනි.
ඉදිරියෙන් කිලෝමීටර් දෙකක් පමණ උතුරු දෙසින් නැගෙනහිර හා බටහිර දිශාවන් යාකරමින් දිවෙන මාර්ගය ත්‍රස්ථ හෝ සිවිල් වැසියන්ගේ ක්‍රියාකාරකම් වලින් සමන්විත දැයි වන සැක සහිත බව නිසාවෙන් ඒ මත මදක් රැඳිසිට එය තරනය කරමින් තවත් කිලෝමිටර් කිහිපයක් ඉදිරියට ගොස් රාත්‍රී ලැගුම් ගැනීම තෝරා ගැනීම මේ කණ්ඩායම් නායකයාගේ අරමුණ නිසාවෙන් අනවශ්‍ය කල් ගැනිම් වලට ඔහුගේ කැමැත්තක් නොවිය.
මාර්ගය ආසන්නයට මීටර් විස්සක් පමණ වන්නට වනතුරු කෑලෑබද ප්‍රදේශය වූ අතර එතැන් සිට මාර්ගය දක්වා කෑලය එලිපෙහෙලි කර තිබුනි. කන්ඩායමේ දෙදෙනා බැගින් මාර්ගයට සමාන්තරව මීටර් සියයක් පමණ දෙපසට සෙසු සාමාජිකයන් ඉදිරියත් පසුපසත් බලාගෙන ස්ථානගත වූයේ මාර්ගය පසුකර යෑම සඳහා ආරක්ෂිතද යන්න දැනගැනීම සඳහයි. මේ කාල සීමාවේදී මිනිසුන් පුරවාගත් ලේලන්ඩ් ලොරි කිහිපයක් මාර්ගයේ දෙපසට ගමන් ගන්නා බව නිරික්ෂනය කිරීම මත පෙරියමඩු ගම්මානය ජනාකීර්ණ තත්වයෙන් ඇතිබවට ඔවුන්ගේ වූ නිගමනයකට පැමිනෙන්න මොවුන්ට හැකිවූයේ ඔවුන් අනෙක් කණ්ඩායම් වලින් වෙන්වී ගෙවුන සැලසුම් කිරීමේ අධියරේදී පෙර විමර්ෂන වාර්ථා හා බුද්ධි අංශ වෙතින් ලබාගත් බුද්ධි තොරතුරු නිවැරදි බවට තහවුරු කරමිනි.
1725 පැය (තිස් අටවැනි පැය.)
-----------------------------------------------
ගම්මානයට මදක් මෑතින් ලොරි රථයක් පනගන්වන හඬ හා එහි වැකුම් පද්ධතිය යථා තත්වයට ගෙන ඒමට එන්ජිම රේස් කරමින් තබාගෙන සිටින හඬ අසමින් තවදුරටත් විමසිමත් වූයේ කිනම් මොහොතක හෝ එම ලොරි රථයද මාර්ගයේ ඔවුන් දෙසට හෝ අනෙක් පසට ගමන් ගැනීම සිදුවිය යුත්තක් වූ බැවිනි. තවත් ස්වල්ප වේලාවකට පසුව බරක් සහිතව ගමන් ගන්නා හඩකින් ලොරිරථය ඈතට ඇදියමින් එහි හඬ නැතිවී යන්න විය. වාහන ගමනා ගමනයත් කෙමෙන් අඩු වෙමින් අඳුර පෙර සේම කලියෙන්ම පලාත වසා ඉක්මනින් පැතිර යන්නට විය. නොනවතින වර්ශාව හා අකුණු ගැසිම අඩුවක් නැතිව පැවතෙමින් තිබුනි. කුමක්දෝ නොතේරෙන මුසල බවක් ඒ අඳුරත් සීතල සුලඟත් සමග පැතිර යමින් තිබුනි.
බොහෝ අවාසනාවන්ත සිදුවීම් සමග මේ මූසල අඳුර ගලා පැමිණ තිබූ බව යුද්ධයේ වැඩි කාලයක් ගතකර නොතිබූ බොහෝ අයහට නොතේරුන මුත් කුමන හෝ නොතේරෙන අවිනිශ්චිත ගතියක් සමහර සිත් තුලට ඇතුල්වී නොතිබුනා නොවේ. නමුත් මේ අටදෙනාගේ සිත් ඇත්තේ එකම අරමුණක පිහිටාය. ඒ ජාති ආගම් කුල බේද වලින් තොරව මේ රටේ වාසය කරන සාමයට ලැදි ජනයාට පීඩාවක් ඔවුනට නිදහසේ හුස්මක් ගැනීමට ඉඩක් නැතිකල මේ බියගුළු ම්ලේච්යින් හට ඔවුන්ගේ භූමියේදීම අනුකම්පා විරහිත මරණයක් උරුම කරදීමේ පිපාසයයි. එබැවින් භාහිර ආපදාවලින් වන ජිවිත හානිය ගැන වන්නාවු බිය ඔවුන්ගේ සිත්තුලින් පලවා හැර තිබුනි.
1810 පැය. (පැය තිස් අටයි මිනිත්තු හතලිස් පහ)
දෙපසට යවා සිටි දෙදෙනා කපිතාන් උදේශ රත්නායක ඔහුගේ සමීපයට මීටර විසිපහක් දුර තෙක් සමීපයට කැඳවා කෝප්‍රල් කුයින්ටස් හට මාර්ගය තරණයට අවශ්‍ය මාවත සකස් කිරීම සඳහා ඉදිරියට යවන්නට විය. මාර්ගය සමීපයට ලඟාවූ කුයින්ටස්
මාර්ඟය හරහා ඇති වැසි ජලය පිරුණු මඩවලවල් කිහිපයක් නිරීක්ෂනය කර ඒ මතින් ගමන් ගැනීම සළකුනු නොරැදී ගමන් කිරිමට සුදුසුම ක්‍රමය නිසා,වෙනදාට පාර හරහා දැමීමට සූඳානම් කරගෙන පැමිනි පොන්චෝ කේප් එක භාවිතයට නොගෙන මාර්ඟය හරහා ගමන් කිරීමට තීරණය කරණා ලඳී. මෙම පොන්චෝ කේප් යොඳා පාරවල් හරහා සළකුණු නොමවන්න ගමන් ගැනීම කමාන්ඩෝ දිගු දුර කණ්ඩායම් මාර්ග හරහා ගමන් ගැනීමේදි භාවිතා කල සම්මත යුධ පිළිවෙතක් විය. (SOP) එමඟින් පාවහන් වල සළකුණු භූමියේ සටහන් වීම වැලක්වීම කරණු ලබයි. මග දෙපස ආරක්ෂාව තහවුරු කර ඇති බැවින් නිදහසේ වේගයෙන් අනෙක් කණ්ඩායම මාර්ගය හරහා ගමන් ගනිමින් මාර්ඟයේ අනෙක් පස ආරක්ෂාව තහවුරු කිරිමෙන් අනතුරුව දෙපස ආරක්ෂාවට සිටි අයගෙන් මුලින් වම් පස දෙදෙනා මාර්ගය හරහා යන තෙක් අවසන් මොහොත දක්වාම පෙරියමඩු ගම පෙදෙසේ රැකවල්ලා සිටි දෙදෙනා ආරක්ෂාව තහවුරු කර අවසානයේ ඔවුන් දෙදෙනාද මාර්ගය පැන තවත් මොහොතක් පිටුපස ඔවුන් පැමිනි මාර්ගය දෙස විමසිල්ලෙන් බලමින් කිසිම ආගන්තුක දෙනෙතකට ඔවුන්ගේ ක්‍රියාකාරකම් නිරීක්ෂනය වී නොමැති බව සනාථ වන තුරු රැඳෙමින් අවධානයෙන් පසුවන්නට විය.
තිස් නවවෙනි පැයෙන් ඇරඹි ප්‍රභාකරන් හා අනෙක් ත්‍රස්ථ නායකයන්ගේ ජීවිත සුරක්ෂිතවූ අවාසනාවන්ත පැය විසි දෙකේහි ඇරඹුම.
----------------------------------------------------
1830 පැය..
පලාතම ගිලගනිමින් වැසියන ඝන අන්ධකාරය නොනවත්වා ඇද හැලෙන ධාරාණිපාත වර්ෂාව නිසා ඇතිකරන අඳුර තවත් වැඩිකර තිබුනි. පලාතම පසුවන්නේ දැඩි නිහඩ තාවයකිනි. ඒ නිහඬ තාවය බිඳිමින් ඉඳහිට පළාතම ආලෝකමත් කරමින් හැඩවෙන අකුණු ගැසීමේ නිමාවක්ද නැත. මාර්ගයත් ගමත් පසුකර තවත් දුරක් ගමන් කර දෙවන දිනයේ ලැඟුම්පල සොයාගැනීම කපිතාන් උදේශ ගේ සිත තුලවූ සැලසුම විය. ඉදිරියට ගමන් ගනිද්දී නැවතත් අත හරින ලද යුධ අගලක් හමුවූ අතර එය තරණය නොකර එයට සමාන්තරව සෙමෙන් සෙමෙන් පෙරියමඩු ග්‍රාමය දෙසට ගමන් කර නැවත ගමන ඉදිරියට කරගෙන යන්න විය. උස් වූ ගස් සේම කමාන්ඩෝ දිගුදුර සෙබළුන් * චෙක් ගස * ලෙස හඳුන්වන ඉනක් පමණ උසට වැවුන ගස් වලින් ගමන් මාර්ගය වැසි තිබුනි.
* මෙම ගස් වර්ගය චෙක් ගස් ලෙස හඳුන්වන්නේ එම ගස් හරහා යමෙක් ගමන් කලහොත් ඒ හරහා ගිය පසු නැවත එම ගස පෙර තිබුන ඉරියව්වට නොපැමිණ ගමන් කල දිශාවටම නැවි තිබීමෙන් යමෙකුට ඒ හරහා යමෙකු ගිය දිශාව නිරික්ෂනය වන නිසාවෙනි. එබැවින් බොහෝ විට එම ගස් හරහා ගමන් කිරීම කමාන්ඩෝ දිගුදුර කන්ඩායම් සෙබළු මග හරිනු ලබයි.
වර්ෂ දෙදහස් එක නොවැම්බර් දහ නවය 1857 පැය..
-------------------------------------------;---------
පොලව හොඳින් පෙඟි මඩවෙමින් ඇති බිමේ බර සහිතව ගමන් ගන්නා මොවුන් හට සතුරූ භූමියේ සිඳුවිය නොහැක්කේ කුමක්ද.?
මෙම කන්ඩායමේ තෙවෙනුවට ගමන් ගත් ලාන්ස් කෝප්‍රල් ගුණසේකර ජී.එම්. ගේ පාදය එක මොහොතක වාරු නැතිව මඩෙහි ලිස්සා ඉදිරියට තල්ලු වී යද්දී මහ හඬින් අකුණු සැරයක් සිය දෙපා පාමුල හැඩවෙනු ගුනසේකරට දැනෙමින් ඔහු උඩුබැලි අතට වීසිවී යන්නේය. පස් කැබළි සිරුරු වල වදිමින් පුපුරාගියේ අකුණක් නොව අත්බෝම්බයක් යැයි සිතා සියල්ල සිටිනා තැන්වල දිගාවුයේ එය අත්බෝම්බයක් නම් දෙවෙනුව ඔවුන් වෙත පොකුරු පිටින් එන උන්ඩ වරුසා වෙන් බේරීම සඳහාය..
කිසිදු දෙවන ප්‍රහාරයක සළකුණක් නැත
තවත් තප්පර ගානනාවක් ඇවෑමෙන් ආලෝකමත් වුන අකුණු සැරයක එලියෙන් ඉදිරියේ කෙනෙකු උඩු බැලි අතට වැටි කැඩී කුඩුවී ගිය පාදය ඉහලට ඔසවාගෙන සිටින අන්දමත් සෙමෙන් ඇසෙනා ඔහුගේ කෙඳිරි ගැමෙන් ඔහු ගුණසේකර බව අවබෝධ වන්නට වැඩි වේලාවක් ගත නොවුන අතර ඔහු පසුපසින් ගමන් ගත් ලාන්ස් කෝප්‍රල් ජයසේකර හට පිපිරීමත් සමග විසිරුණ පස් නිසාවෙන් ඔහුගේ දෑසම පෙනෙන්නේ නැති බැව් කොඳුරා ළඟ සිටියෙකුට කියන්නට විය. කලින් ගුවන් හමුදා කන්ඩායම් විසින් වලදමන ලද පුද්ගල නාශක බෝම්බයක් ගුණසේකරගේ පාදයට හානි කරමින් රටක ඉදිරි ඉරණම තවදුරටත් පීඩාකාරි කරමින් රටේ කුමන ජාතියේ වුව තරුණ ජීවිත විනාශ වන්නට ඉඩ හරිමින් පුපුරා ගොස් තිබුනේ ලාන්ස් කෝප්‍රල් ගුනසේකරගේ දකුණු පාදය සුණු විසුණු කරමිනි.
උතුරේ හා දකුනේ දේශපාලන අධිකාරිය සටන් විරාමයක් මගින් තාවකාලිකව හෝ සාමයක් අපේක්ෂා කරමින් සිටියත් ඔහුගේ ත්‍රස්ථ කණ්ඩායම් වල ප්‍රහාරයන් හමුවේ ආරක්ෂක හමුදාවන් ලබමින් තිබූ පරාජයන් ගෙන් උමතුව උඩඟුව ප්‍රභාකරන් සිය ම්ලේච්ච රුධිර පිපාසිත නායකයින් ඉදිරියේ මහවිරු දිනයේදි ද්‍රවිඩ ඊළම ජයග්‍රහණය කර මෙහෙයවන අන්දම හා මීළඟ වසරේ වෙනම රටක ඔවුන්ගේම වූ රටක මහවිරු දිනය පවත්වන අන්දම කියන්නට සටන් විරාමය ප්‍රතික්ෂේප කරමින් සිටින මොහොතක සුන්දර තරුණ ජීවිත අටක් අධික බරකින් යුතු ගමන් මළු හා පාදයක් අහිමිවු සෙබලෙක් දෑස නොපෙනි ගිය සෙබළෙක් සමග ඉදිරි පැය කිහිපය සිය දෛවය කෙලෙස විසදෙන්න යන්නේද යන බව නොදැන බලාසිටින්නට විය.
මොහොතකින් සිය මනස අවධිකරගත් කපිතාන් උදේශ රත්නායක අනෙක් සාමාජිකයන්ට ආරක්ෂාව සපයන්නට අණකරමින් සිය කණ්ඩායමේ සිටින ප්‍රථමාධාර සඳහාම විශේෂිත පුහුණුවක් ලබා සිටි ලාන්ස් කෝප්‍රල් ඉන්දිකව කැඳවන්න විය.
"ඉන්දික පොඩ්ඩක් බලපන් මොකක්ද කරන්න පුළුවන් කියලා"
සෙමෙන් අවට පරික්ෂා කර බලමින් තවත් බිම් වෙඩි ඇත්දැයි විමසිලිමත් වෙමින් ගුණසේකර වෙත ගමන්කල ඉංදික ඒ වනවිටත් රුධිරය විදිමින් කැබළිවී එල්ලෙමින් තිබුන ඔහුගේ පාදය සිය දනහිස උඩට ගනිමින් පරික්ෂාකර බැළුවේ පළමුව මේ රුධිර වාහනය වීම නතර කරන්නේ කෙලෙසද කියායි. දන හිසට අඟල් කිහිපයක් පහලින් කැබළිවී එල්ලෙමින් තිබුන පාදය ඒ අයුරින් වෙලිමෙන් සාර්ථක ප්‍රතිඵල අත් නොවන නිසා ඔහු සිය කණ්ඩායම් නායකයාගේ අවසරය පතමින් මුහුණ දෙස බලන්නට විය.
"සර් ඩ්‍රෙස් කරන්න නම් කකුළේ මේ කෑලි කපන්න වෙනවා. මම කපන්නද ?
"සර් මට ග්‍රේනේඩ් එක පුපුරව ගන්න දීලා සර්ලා යන්න දැන් සද්දෙට මුන් බලන්න ආවොත් හැමෝටම මැරෙන්න වෙනවා" ?
ඒවනවිටත් සිය බෙල්ට් ඕඩරයේ වූ අත්බෝම්බයක් සිය අතටගෙන සිටි ගුනසේකර කෙඳිරි ගාමින් අපහසුවෙන් මුත් සිය අනෙක් සාමාජිකයින්ද ඔහු නිසා අමාරුවේ වැටීම නොඉවසමින් ඔවුන්ට ඔහු හැරයන්න පවසයි"
" බඩි කලබල වෙන්න එපා උඹව දාලා අපි යන්නේ නෑ මැරෙන්න වුනොත් ඒක හැමෝම එකට ඒක උඹට විතරක් වෙන්න දිලා අපි යන්නේ නෑ.. ඉන්දික හොඳයි කියලා හිතෙන දෙයක් කරපන්."
සිය සගයාගේ ජීවිතය ගලවා ගැනීමට කලයුතු හොඳම දේ කිරීමට ඔහු සිය අනුමැතිය ඉන්දික හට ලබාදෙන ලදි.
සිය ඉනෙහි රඳවා ගෙන සිටි පිහිය එලියට ගනිත්ම ගුනසේකරගේ පාදයේ කොටස් බිඳී කැබළිවී ඇති අන්දම නිරීක්ෂනය කරමින් එකම මට්ටමට එන සේ ඔහුගේ පාඳයේ රැලිලෙස එල්ලෙන රුධිරයෙන් පිරී පෙගීගිය මස් කැබළි කොටස් කපමින් ඉවත් කර ඔහු සමිපයේ වූ ගෝස්ට් හා ඉලස්ටෝ ප්ලස්ටර් යොදාගනිමින් රුධිර වාහනය පාලනය වන අන්දමට පාදය වෙලන්නට විය. මෙහිදි මොවුන්ට තවත් කරදරයකට මුහුණ පාන්නට සිදු විය. ඒ රුධිරය වැටෙන සෑම තැනකම කඩි මතුවීමයි. එසේ මතුවන කඩින්ගේ වේදනාකාරි දල ප්‍රහාරයන්ට ලක්වෙන්න සිදුවීම නිසාම රුධිරය වැටෙන තැන් පාදයෙන් මඩ කරමින් සිටිමට අයෙකු යොදවන්ට වී තිබුනි.
වෙළුම් යොදමින් රුධිරය ගැලීම පාලනය කර ඉන් අනතුරුව වේලාව සටහන් කර ගනිමින් සේලයින් බෝතලයක් තුවාල කරුගේ සිරුරට සම්භන්ධ කරමින් එය හරහා වේදනාව පාළනය කිරීමට ඉන්දික විසින්ම මෝෆීන් මාත්‍රාවක් එක් කරන්නට විය.
ඉන්දික විසින් සිය කාර්‍යාය ප්‍රවීනයෙකුගේ ගති ස්වභාවය ප්‍රදර්ශනය කරමින් කිසිඳු කලබල වීමකින් තොරව සිදු
කරද්දී අනෙකුත් සාමාජිකයන් අතර ගුණසේකරගේ ගමන් මල්ලේ වූ සියළුම භාණ්ඩ උපකරන බෙදෙත්දී නැවත ගුනසේකර සිය අණදෙන්නා අමතමින් ඉල්ලීමක් කරන්නට විය.
"සර් මට මගේ ළඟ මේ ග්‍රේනේඩ් එක තියාගන්න ඉඩ දෙන්න"
ඔහු දෙස මොහොතක් බලාසිටි කපිතාන් උදේශ එයට ඉඩ දෙමින් ඔහු අතවූ ග්‍රේනේඩ් එක ඔහු සන්තකයේ තබාගන්නට අවසර ලබාදෙන ලදි.
පාදයක් අහිමීවී ගිය තුවාල කරුවෙකු සමග තවදුරටත් ඉදිරියට යෑම කල නොහැකි දෙයක් නිසා මුලින්ම තුවාල කරු ආරක්ෂක ස්ථානයක් වෙත ගෙන ඔහුව පිටත්කර යවා ක්‍රියාන්විතය ඉදිරියට කරගෙන යෑම හෝ අත් හැරීම සිදුකිරීම පසුවට තබා නැවත තුවාලකරු ඔසවාගෙන මාර්ගය වෙත රැගෙන විත් එය පෙර පරිදිම ආරක්ෂිතව කිසිඳු සළකුනක් ඇති නොමවන්න පසු කරමින් අත හැර දමන ලද කඳවුර තෙක් පැමිණ එහිවූ ගිලන් මැස්ස රෝගියා ඔසවා ගෙන යෑමට හැකි ලෙස සකස්කර තවත් කිලෝමීටර් දෙකක් පමණ පසුපසට පැමිනෙන්න විය.
මෙම ක්‍රියාන්විතය මෙයින් පසුව සිදුකල පසුකථනයෙන් කමාන්ඩෝ දිගුදුර මෙහෙයුම් කණ්ඩායම් සාර්ථකව සිදුකල මෙහෙයුම් ගනනාවක් සඳහා ස්ථවර යුධ පිළිවෙත් (SOP) සකස් කිරීමට උපකාරි වුන ක්‍රියාන්විතයක් විය. මෙහිදි ඔවුන් අතර මග සිදුවීමක් වුවහොත් ගුවන් යානාවක් ගොඩ බස්සවන්න සුදුසු ස්ථාන හඳුනා ගෙන නොතිබුන බැවින් සිතියම මාර්ගයෙන් එයට සුදුසු තැනක් බලා ගෙන පසුපසට පැමිනිමට සිදුවිය.
කිලෝ මීටර දෙකකට ආසන්නයේ නැගෙන හිර දෙසින් ගම්මානයකි එසේම ත්‍රස්ථවාදී කඳවුරක පිහිටීමක් බුද්ධි අංශ පෙන්වා දී ඇත. එකම ආශිර්වාදයක් ලෙස දැන් ඇත්තේ මුලින් කරදරයක් ලෙස සිතූ වර්ෂාව හා අකුණු ගැසීමය. වර්ෂාව හා අඳුර නිසා ඉන්න තැනකට සීමාවී සිටීම හා අකුණු ගැසිම මත මේ බිම් බෝම්බය පිපිරීමේ හඬ කිසිවෙකුට වෙන්කොට හඳුනා ගැනීමට බැරිවීම වාසියක් වී තිබුනී. මේ සැමටම වඩා බොහෝ විට බිම් බෝම්බයකට පාදය හසුවීමෙන් පසු බොහෝ සොල්දාදුවන් මරහඬ නගමින් විලාප දෙනු ලබන එක පොදු සුළභ කරුණක් වූවත්, ගුණසේකරගේ මුවින් පිටවුයේ සිහින් කෙඳිරියක් පමණී. ඔහු සතුරු වලල්ලට බොහෝ ඔබ්බෙන්වූ මේ අනතුර තරමටම විශ්මය බිඳීගිය හොත් සිදුවන අන්තරාව තේරුම් ගෙන ක්‍රියා කිරීම පැසසිය යුත්තක් විය.
2000 පැය. (හෙලිකොප්ටර් ගොඩ බැස්සවීමේ කලාපයක් සොයා යෑම)
-----------------------------------------------------
කිලෝ මීටර දෙකක් පමණ ආපස්සට පැමිණීමෙන් අණතුරුව විශාල ගසක් පාමුල ගුණසේකරව රැඳවීමෙන් පසු ඉන්දිකව ඔහු සමිපයේ රැඳවු කපිතාන් උදේශ ඔහු අමතන්න විය.
"ඉන්දික අපි ගුනසේකරව යවන්න හෙලිපෑඩ් එකක් හදන්න යනවා ඔයාට මෙයාව බලන් ඉන්න පුළුවන් නේද".
"පුළුවන් සර් මම ඉන්නම්"
"හරි සේලයින් එක ඉවරවෙන්න කොච්චර වෙලාවක් යනවද"
"සර් පැය දෙකකින් ආයේ මෝෆින් එකක් දෙන්න ඕනේ"
හරි ඔයා පැය දෙකකින් මට කථා කරන්න මම එන්නම්"
"ගුණසේකර අපි යන්නේ ඔයාව පස්සට ගන්න හෙලිපෑඩ් එකක් හඳන්න ඔයා එක්ක මෙතන ඉන්දික ඉන්නවා බයවෙන්න එපා බඩි අපි උඹව තනි කරන්නේ නෑ මොනම හේතුවකටවත්"
"නෑ සර් මම බය නෑ "
1910 පැය දක්වා ආපස්සට මන්නාරම පාබල හමුදාවේ අප්‍රකට හමුදා අනුකන්ඩයක්..
-----------------------------------------------------
මේවන විට අදාල ප්‍රදේශයේ සිදුවන ක්‍රියාන්විත සම්භන්ධිකරනය කරමින් මෙම කණ්ඩායම් තුන කළමණාකරණය කිරීමට පහසු ලඟම වන ස්ථානයක් වූ මන්නාරම ප්‍රදේශයේ පාබල හමුදා අනුකන්ඩයක නතරවී සිටි එවකට මේජර් (වර්ථමාන මේජර් ජෙනරාල්) ශානක රත්නායක හට කපිතාන් උදේශ රත්නායකගෙන් ඇමතුමක් ලැබෙන්නේය.
ක්‍රියාන්විතයකට කණ්ඩායමක් ආරක්ෂක වලල්ලෙන් ඔබ්බට ගියවිට ඒ කණ්ඩායම නැවත කඳවුර වෙත පැමිනෙන මොහොත තෙක් ගුවන් විදුලි යන්ත්‍රය සිය ආසන්නයේම තබා ගැනීම පුරුද්දක් කරගත් මේජර් ශානක රත්නායක ඒ කණ්ඩායම් අතර වන සංවාද හොඳින් ඇහුන්කම් දෙමින් එම ක්‍රියාන්විතයට අනුගතවීම සිඳුකල අතර, ඔහුවෙත එන ඕනෑම ඇමතුමකට එදවස ඔහු පළමුවරම පිළිතුරු දීම නිසා ඉදිරි පෙල ගමන්ගන්නා කණ්ඩායම්වල සෙබළුන් හට ඔහුගැන වූයේ දැඩි විශ්වාසයකි. එමඟින් එම කණ්ඩායම් වල ඉදිරියට ගමන් ගැනීමට වැඩි උත්තේජනයක් සැපයු බව නොරහසකි.
ලියෝන් ෆොර් එයිට් ෆයිව් ඕවර්..
දිගු දුර ක්‍රියාන්විත සම්භන්ධිකරණය කරන්නාවූ මේජර් ශානක රත්නායක හට කපිතාන් උදේශ රත්නායක වත්මන් සිඳුවීම වාර්ථාකර ඔහුව ගෙන යෑමට ගලවා ගැනීමේ මෙහෙයුමක අවශ්‍යථාවය සඳහන් කරන්නේය.
සිය ආරක්ෂිත ගුවන් විදුලි සංඥා යන්ත්‍රය මගින් සිය අණදෙන නිළධාරීවූ කර්නල් ලලන්ත ගමගේ අමතා සිදුවීම වර්ථා කල ඔහු මුදවා ගැනීමේ මෙහෙයුම සඳහා උපදෙස් පතන්නට විය.
මේ වන විට රාජකාරි කටයුත්තක් සඳහා කොළඹ බලා පිටත්ව ගොස් සිටි ඔහු වහා සිය දෙවන අනදෙන නිළධාරීයාවු එවකට මේජර් (විශ්‍රාමික මේජර් ජෙනරාල්) උපාලී රාජපක්ෂ හට ඔහුවෙත ලැබුන පනිවුඩය රහස්‍ය සංඛේත නාමයන් යොදා ගනිමින් ලබාදුන් අතර මේවන තුරු රහසක්ව සීමිත නායකයින් කිහිප දෙනෙකු පමණක් දැනසිටි මේ ක්‍රියාන්විතය ගලවා ගැනීම සිදුකරන තුරුත් එලෙසම රකින්නට උපදෙස් දෙමින් ඔහුව ආරක්ෂක සේණා මුලස්ථානය (වන්නි) වෙත පිටත්කර යවන්නේ ආරක්ෂක වළල්ලෙන් ඔබ්බෙහි සිදුවී ඇති තත්වය වාර්ථාකරමින් කඩිනම් මුදවාගැනීමේ මෙහෙයුමක අවශ්‍යථාවය බ්‍රේගේඩියර් මාන්ඩළික ප්‍රධානී වෙත දන්වා සිටිමිනි.
වන්නී බ්‍රේගේඩියර් මාංඩලික ප්‍රධානී හා දෙවන කමාන්ඩෝ රෙජිමේන්තු අණදෙන නිළධාරී සම්භන්ධය....
-----------------------------------------------------
මෙම සිඳුවීමට හරියටම මාස හයකට පෙර වන්නි ආරක්ෂක සේනා මුලස්ථානය...
බ්‍රෙගේඩියර් මංඩළික ප්‍රධානී නිල කර්‍යාලය
1030 පැය.....
දෙවන කමාන්ඩෝ රෙජිමේන්තු අණදෙන නිළධාරී කර්නල් ලලන්ත ගමගේ එවකට වන්නි බ්‍රේගේඩියර් මාංඩළික නිළධාරී ලෙස කටයුතු කල දක්ෂ මෙන්ම කිර්තිමත් යුධ සෙනෙවියෙකු වූත් පසුව යුධ හමුදාවට අණදීමේ භග්‍ය ලද එවකට බ්‍රේගේඩියර් (විශ්‍රාමික ජෙනරාල්) ක්‍රිශාන්ත ද සිල්වා හමුවීමේ බලපොරත්තුවෙන් ඔහුගේ කර්‍යාලය අභිමුවට පැමිණ තිබුනි. කර්නල් ලලන්ත ගමගේ යනු ඔහුට අවශ්‍ය කාර්‍ය කරගැනීම සඳහා ජනධිපති හමුවීම අවශ්‍ය නම් ඔහු කෙසේ හෝ හමුවී එය කරගන්නා අයෙකි. පහලම ලිපිකරුවා ගේ සිට ඉහලම නිලධාරියා දක්වා ඔහුම යමින් එමින් එම කර්‍ය සාර්ථකව අවසන් කිරිම ඔහුගේ පුරුද්දයි. මොහුගේ ඇමතිමෙන් යම් විශේෂයක් ඇති නිසාම ඔහු හා බොහෝ සුහද බ්‍රේගේඩියර් ක්‍රිශාන්ත ද සිල්වා ඔහුට මදක් රැඳෙන්න කියා සිය ප්‍රමුඛ කර්‍යන් අවසන් කලේ මොහු හා කථාව බොහෝ දුර යන එකක් බව දන්නා නිසායි.
මා එය හිටපු යුධ හමුදාපති තුමන් කියු ආකාරයෙන්ම ලියා තබන්නම්.
"ආ එන්න ලලන්ත හුඟ කාලෙකින් මොනවද වෙන්න ඕනේ"
"සර් සර්ල අපේ LRRP කොල්ලෝ පාවිච්චි කරන්නේ ## ලට ටාගර්ට් ගන්න යන්න පාරවල් ක්ලියර් කරවන්න විතරයි. එහෙම කරන්න එපා අපියි හමුදාවේ මුලින්ම LRRP මිෂන් කලේ. මගේ කොල්ලන්ටත් එක ඒරියා එකක් වෙන්කරලා දෙන්න..
මේ වනවිටත් කිසිඳු ප්‍රසිද්ධියකින් තොරව සිය කාර්‍ය කරගෙන යන කාමාන්ඩෝ දිගුදුර මෙහෙයුම් කණ්ඩායම් ගැන යුධ හමුදාවේ දැන සිටියේ බොහෝ අතලොස්සක් දෙනා පමණි. වරක් කිලාලී කලපුව තරණය කර මුහමාලේ ත්‍රස්ථ ආරක්ෂක වලල්ල විනිවිද නගර්කෝවිල් වෙත ගොස් පැමිණි කණ්ඩායමක් ඒ බව හිටපු ආරක්ෂක ලේඛම් හා පසුව ජනාධිපති වූ ගරු ගෝඨාභය රාජපක්ෂ මහතා ඉදිරියේ විස්තර කරද්දී තමාට ශරීර ආරක්ෂව ලබා දෙන කමාන්ඩෝ කණ්ඩායම් අතර මෙවන් සුවිශේෂි සෙබළ කණ්ඩායමක් සිටින බව ඒ වනතෙක් දැන සිටියේ නැත. එය වර්ථමාණයටද එසේමය බොහෝ කණ්ඩායම් වල දිගුදුර මෙහෙයුම් ගැන බොහෝ කතා පලවෙද්දී කොටි ත්‍රස්ථවාදින්ගේ දෙපාමුලට ගොස් හිස ගලවාගෙන ආ කොටි සංවිධානයේ තෙවෙනියා වූ අමුදන් මාස්ටර් නොහොත් මල්ලිගේ සිට බොහෝ ත්‍රස්ථ නායකයන්ගේ නිහඬ ඝාතකයන් මේ කමාන්ඩෝ දිගුදුර මෙහෙයුම් කන්ඩායම් වල සාමාජිකයින් බව අදත් දන්නේ බොහෝ සුළු අත්‍යාවශ්‍යම පිරිසක් පමණි.
"නෑ ලලන්ත මගේ ## ලට කියලා විශේෂ සැලකිල්ලක් නෑ. හැමෝටම මගේ සැලකීම එකවගේ ඔයා මට වෙන්න ඕනදේ කියන්න මම ඔයාගේ ටීම් වලටත් අවශ්‍ය පහසුකම් සලසන්නම්"
මේ කතිකාවෙන් පසුව සිදුකෙරුන බොහෝ සාකච්චා වන්ගෙන් පසුව A-9 මාර්ගයෙන් නැගෙනහිර විශේෂ බළකායටත් බස්නාහිර කමාන්ඩෝ රෙජිමේන්තුවටත් ලෙස ක්‍රියාන්විත සඳහා වෙන්වෙන්නේය.
පවත්නා තත්වය පනිවුඩය ලද සැනින් බ්‍රේගේඩියර් ක්‍රිශාන්ත ද සිල්වා හට දැනුම් දුන් අතර, ඔහු එය රහස්‍ය කේත යොදාගනිමින් එවකට වන්නි ආඥාපති
වු මේජර් ජෙනරාල් ශාන්ත කෝට්ටේගොඩ හා හමුදාපතිව සිටි ලුතිතන් ජෙනරාල් ලයනල් බළගල්ල හා මාන්ඩළික ප්‍රධානී ජෙනරාල් (දිවංගත) රොහාන් දළුවත්ත වෙත වාර්ථාකර මෙම කන්ඩායම ආරක්ෂිතව ගෙන්වා ගන්නා තුරු රහස්‍යභාවය රඳවා තබා ගැනීම හා අත්‍යාවශ්‍ය දේ පමණක් අදාල තැන්වලට දැන්වීමටත් සියළු පනිවිඩ රහස් ඛේත හරහා පමණක් සිදු කිරීමටත් තිරණය කරන ලදි.
මේ අනුව ආරක්ෂක සේනා මූලස්ථානය කරාගිය මේජර් උපාලි රාජපක්ෂ වෙත බ්‍රේගේඩියර් ක්‍රිශාන්ත ඩී සිල්වා විසින් පෞද්ගලිකවම මැදිහත්වෙමින් සන්නද්ධ රථයක් (BMT) හා ඩබල් කැබ් රථයක් ලබාදෙමින් ඒවන විට හමුදා මාර්ග ආරක්ෂාව ඉවත්කර ඇති වව්නියා මැදවච්චිය මාර්ගය හරහා අරක්ෂිතව හිඟුරක්ගොඩ ගුවන් හමුදා මුලස්ථානය වෙත පිටත් කර හැරියේ ගුවන් හමුදා යානාවල සහය මුදවා ගැනීම සඳහා යොදාගැනීම සම්භන්ධිකරනය කිරීමටයි..
මේවන විට හිටපු ගුවන් හමුදපති වරයෙකු වූ එවකට ගුවන් ක්‍රියාන්විත අධ්‍යක්ෂක වරයාව සිටි ගෲප් කපිතාන් රොෂන් ගුණතිලක මහතා සහ බ්‍රේගේඩියර් ක්‍රිෂාන්ත ද සිල්වා සියළු සම්බන්ධතාවයන් පවත්වා ගනිමින් ඔවුන් හට මේ ක්‍රියාන්විතය සිදුකිරීමට ඇති ආරක්ෂාව පිළබඳව විශ්වාසනීයත්වයක් ඇති කරවන්න වෙහෙසක් ගන්නට විය. මෙය සතුරු ආරක්ෂක වළල්ලෙන් ඔබ්බේ අනාරක්ෂිත ප්‍රදේශයක කිරිමට සිදුවීම අයහපත් කාලගුණ තත්වයන් මත ඉදිරිය නිරීක්ෂණය කිරීමට වන අපහසුතාවය ත්‍රස්ථවාදින් සතුව ඒවනවිට තිබූ භූමියේ සිට ගුවනට විදීමේ හැකියාව ඇති සෑම මිසයිල යන සාධක මේ ක්‍රියාන්විතයට ගුවන් යානා නොයෙද වීමට හේතුසේ දැක්වෙමින් තිබුනි. ගුවන් හමුදාවේ විශ්වාසය තහවුරු කිරීම රැය පහන් වනතුරු ක්‍රියාන්විත සම්බන්ධීකරණය කරන මේජර් ශානක රත්නායක මෙන්ම ක්‍රියාන්විතයේ සිටින කපිතාන් උදේශ රත්නායකගෙන් ලබාගන්නා තොරතුරු ලබාගනිමින් බ්‍රේගෙඩියර් ක්‍රිශාන්ත ද සිල්වා ක්‍රියාන්විත මැඳිරිය තුල ඔහුට විශ්වාසම නිළධාරීන් කිහිප දෙනෙකු ගෙන්වා ගනිමින් කටයුතු කරමින් ඉන්නා ලඳි. මේ මෙහෙයුම නිමාකරන තුරු ජනමාධ්‍ය වෙත මේ බැව් ආරංචි නොවිමට කටයුතු කිරිම අනෙක් අභියෝගයයි මෙය යම් ලෙසකින් ඉව වැටී එය ප්‍රසිද්ධ වුවහොත් මුළු ගලවා ගැනීමම අවුල් ජාලයක් වී ඒ ජිවිත අටම විනාශ විය හැකි බැවින් සෑම විටම රහස් කේථ පමණක් භාවිත කරමින් පනිවිඩ හුවමාරුව සිදුවුණි.
මේජර් රත්නායකට උපදෙස් ලබාදෙමින් බ්‍රේගේඩියර් ක්‍රිශාන්ත ද සිල්වා ඒ ආසන්නයේ වූ සැරයන් රත්නායක හා ලුතිතන් නන්දන අබේකෝන් ගේ ක්‍රියාන්විත අවලංගු කර ඔවුන්වද මේ සිදුවීම සිදුවී ඇති ප්‍රදේශය ආසන්නයට ලන්කරවමින් බාහිරින් එන සතුරු අභියෝගයක් වේනම් ඒවා ප්‍රමාද කරවන්න සැලසුම් කෙරිනී.
කපිතාන් උදේශ රත්නායක ඇමතු බ්‍රේගේඩියර් ක්‍රිශාන්ත ද සිල්වා විමසුවේ
"උදේශ ඔයාගේ මෙඩික් ලඟ වේදනා නාශක තියනවාද යන්නයි."
"ඔව් සර් මෝෆීන් ඇතිවෙන්න තියනවා"
"හරී හෙට දවස ඇතුලත කැෂුවල්‍ටිය අපි රිකවර් කරනවා. ලමයට කෑගහන්න දෙන්න එපා. අවශ්‍ය වෙලාවට මෝෆීන් දෙන්න මෙඩිකල් ඇසිස්ටන්ස් ඕනේ නම් කියන්න මම ඩොක්ටර් කෙනෙක් ගෙන්නන්නම් උපදෙස් දෙන්න. කැෂුවල්ටි එක හොදට මොනිටර් කරන්න බ්ලීඩ් වෙන්න දෙන්න එපා. හෙට එලි වෙනකම් අල්ලන් ඉන්න.
හිඟුරක්ගොඩ ගුවන් හමුදා කඳවුර හෙලිකොප්ටර් බළඝනය..
0230 පැය.2001.11.20 දින
-----------------------------------------------------
මේ වන විට එම ස්ථානයට බෙල් 212, Mi 17 හා MI 24 යන බළඝනවලට අයත් ගුවන් හමුදා අණදෙන නිළධාරින් ගුවන් නියමුවන් පැමිණ තිබූ අතර, ඔවුන්ගේ කියවීමට අනුව ගලවා ගැනීමේ මෙහෙයුමේ ගුවන් හමුදා සහය පවත්නා තත්වයන් හී අවදානම සලකා 90% පමණ නොවන තත්වයේ විය.
එය සුභවාදී සම්හන්ධී කරණයක් සඳහා බ්‍රේගේඩියර් සිල්වා හා ගෲප් කපිතාන් රොෂාන් ගුණතිලක හරහා මේජර් උපාලී රාජපක්ෂ බොහෝ විශ්වාසනීයත්වය තහවුරු කිරිම් කරන්නට විය. ගුවන් හමුදාවෙන් තවත් කොන්දේසියක් එක් කෙරිනී,ඒමේ ක්‍රියාන්විතය සඳහා කමාන්ඩෝ ජ්‍යේෂ්ඨ නිළධාරියෙකු ගලවා ගැනීමේ කණ්ඩායම සමග පිටත්විය යුතුයි යන්නයි.
බ්‍රේගේඩියර් ක්‍රිශාන්ත ඩී සිල්වා මේජර් උපාලි රාජපක්ෂ වෙත හැරිනී.
මේ මොහොතේ තමන්ගේ රෙජීමේන්තුවේ කන්ඩායමක් ජීවිත අනතුරක මැදිවීය.සිය බිරිය කමාන්ඩෝ නිළධාරියෙකු වූ කපිතාන් රසික් ගේ විවාහ මංගල්‍ය උත්සවයක් සඳහා මල් කුමරු ලෙස සිය පුතුව රැගෙන යෑමට එනතුරු පෙරමඟ බලන් සිටී.මේජර් උපාලී රාජපක්ෂ යනු සැමවිටම සිය සෙබළුන්ගේ කරඳරය ඉඳිරියේ කොන්දේසී විරහිතව සිටගන්නෙකී.
ඔහුගේ වචන ස්ථීර විය.
"සර් කිසි ප්‍රශ්නයක් නෑ මම චොපර් එකේ යන්නම්"
දෙවැන්න ආසන්නව ඇති හමුදා කණ්ඩායම් ස්ථානගත කිරීම.
මේජර් උපාලි රාජපක්ෂ විසින් ඒ වනවිට පළමු වරට සිදුවීම ආසන්නයේ ඔහුට ලබාදී තිබූ දිගුදුර මෙහෙයුම් කණ්ඩායම් ස්ථානගත කිරීම් ගුවන් නියමුවන් හට පෙන්වූ විට ඔවුන්ගේ විශ්වාසය තවදුරටත් තහවුරු විය. ඒ වගේම මේ ගලවා ගැනීමේ මෙහෙයුම හී ගොඩ බෑසීම සඳහා යොදවන බෙල් 212 හෙලිකොප්ටර් යානාව ප්‍රධාන ගුවන් නියමුවා වූ ස්කොඩ්‍රන් ලීඩර් (දිවංගත) සුදම් කළුආරච්චි කොළඹ රාජකීය විදුහලේ මේජර් උපාලි රාජපක්ෂ හා එකට සිප් සතර හැදෑරූ ඔහුට කනිෂ්ඨ මිතුරෙකු වූ අතර, ඒ මිතුදම නිසාම මේ මෙහෙයුම නොකර සිටීමේ හැකියාවක් ඔහුට නොතිබුන බවත් ඔහු සිය ජ්‍යේෂ්ඨ පාසල් මිතුරා වෙනුවෙන් ඒ සඳහා කැමැත්ත පලකිරීම මතම අනෙක් ගුවන් නියමුවන්ද මේ සඳහා කැමැත්ත පල කරණ ලදී. විශ්වාසනීයත්වය එසේ පල වූවද භූමියේ අවාසිය ගුවන් ක්‍රියාන්විතයක් පරයා යා නොහැකි සීමාන්විතයකට කොටුවී සිටියාය. ඒ වනවිටත් පැවති දැඩි වර්ෂාව මත ගුවනේ සිට පෙනීමේ සීමාව අවම ලෙස මීටර් අටසියයක් දුරක් වත් නොවේනම් ගුවන් යානා ඉහලට එසවිය නොහැකි බව පැවසුනී.
හැකිබව නොහැකි බව අතර ජීවිත අට දෝලනය වෙද්දී මේජර් ශානක රත්නායක භූමියේ කණ්ඩායම් සම්බන්ධිකරනයත් මේජර් උපාලී රාජපක්ෂ ගුවන් හමුදා ගුවන් නියමුවන් හා විශ්වාසය ගොඩනගමින් ඔවුන් හා ගුවනට පිවිසිමේ අරගලයකත්, බ්‍රේගේඩියර් ක්‍රිෂාන්ත ද සිල්වා රහස්‍ය භාවය රකිමින් සියළු කටයුතු සාර්ථකත්වය කරා මෙහෙයවීම සම්භන්ධි කරණය කිරීමේ අරගලයකත් භූමියේ තුවාල කරුවන් දෙදෙනෙකු අතර අධිකව රුධිරය වාහනයවන තුවාල කරුවෙකු සමග ඔහුගේත් තම සාමාජිකයන්ගේත් ජිවිතය ගලවා ගැනීමේ අරගලයක කපිතාන් උදේශ රත්නායකද නිරත වෙමින් ඔහුව ආරක්ෂිතව පිටත් කර හැරීමේ භූමිය සැකසීමේ බැරෑරූම් කාර්‍යයේ කොටුවී රැය පහන් කරමින් ගෙවෙමින් තිබෙයි.
මෙම තත්වයේ බෑරෑරුම් කම මේවනවිට ආරක්ෂක අමාත්‍ය දිවංගත ගරු ජෙනරාල් අනුරුද්ධ රත්වත්තේ හටද එමඟින් අතිගරු ජනාධිපතිනීයවූ චන්ද්‍රීකා බන්ඩාරනායක කුමාරතුංග හටද සැලකර තිබිනී.ඔවුන් ගේ උපදෙස වූයේ කෙසේ හෝ මේ කන්ඩායම ආරක්ෂිතව මුඳවා ගතයුතු බවයි.
දෙදහස් එකක් වූ නොවැම්බර් මස විසිවන දින ..
පෙරවරූ 0610 පැය..
අරක්ෂක මාන්ඩළික ප්‍රධානී වෙතින් ගුවන් හමුදාපතිවෙත එක් රහසිගත පනිවුඩයක් ලැබෙන්නේය.
එවකට ආරක්ෂක මාන්ඩළික ප්‍රධානීවූ ජෙනරාල් රොහාන් දළුවත්තග විසින් ගුවන් හමුදාපති වරයාගෙන් ඉල්ලිමක් කරමි නිකුත් කෙරුන ඒ පනිවුඩයෙන් කියවි තිබුනායැයි පැවසෙන්නේ මේ මුදවා ගැනීම සිදු කිරීමට යම් ලෙසකින් නොහැකිව එම කණ්ඩායම සතුරා අතට පත්ව විනාශ වුවහොත් ඉදිරීයේ මෙවන් දිගුදුර මෙහෙයුම් සඳහා ක්‍රියාන්විත කණ්ඩායම් යෙදවීමේදී ඔවුන් යම් අපහසුතාවයකට පත්වුවහොත් ගලවා ගැනීමේ කන්ඩායම් වල,පැමිනීම ගැනවන විශ්වාසනීයත්වය බිඳී යා හැකි බැවින් කෙසේ හෝ මේ ගලවා ගැනීමේ මෙහෙයුමට ගුවන් හමුදාවේ ගුවන් යානා යෙඳවීමේ හා ඔවුන්ගේ දායකත්වය ලබාදීම අත්‍යවෂ්‍යවූ දෙයක් වූ බවයි.
වන මැද අරගලය අවසන් කොටස සමගින් හමුවෙමු
පුන්‍යානුමෝදනාව :-
මේ සඳහා මා දිරිමත් කරන කමාන්ඩෝ රෙජිමේන්තු අධිපති තුමන් වන
මේජර් ජෙනරාල් ශානක රත්නායක ජ්‍යේෂ්ඨ නිලධාරි තුමන්,
මේ විසිරි ගිය මතක සිතුවම වර්ණ ගන්වන්වන්නට සිය වටිනා කාලය යොදවමින් මාහට නිවැරදි තොරතුරු ලබාදෙමින් මේ මතක සිත්තම වර්ණ ගන්වන්නට මතකය අවදි කරමින් උපකාර කල..
ජෙනරාල් ක්‍රිෂාන්ත ඩී සිල්වා හිටපු යුධ හමුදාපති තුමන්.
මේජර් ජෙනරාල් උපාලි රාජපක්ෂ ජ්‍යෙෂ්ඨ නිලධාරි තුමන් මෙන්ම
නිතර මා නිවැරදි මගට හා මෙම ලිපි පෙලෙහි සමබරතාව මෙන්ම ගුනාත්මක බව පවත්වාගෙන යාමට මා යොමු කරවන කර්නල් සුජිත් ජයසේකර නිළධාරි තුමන්,
මේජර් නිශ්ශoක සේනාධිපති නිළධාරි තුමන්,
කර්නල් ජනක රිටිගහපොල නිලධාරී තුමන්,
යන ගෞරවනිය ජ්‍යේෂ්ඨ නිළධාරි තුමන්ලා වෙතද..
මේ ලිපි පෙළෙහි නිවැරදි තොරතුරු තහවුරු කිරීමෙහිලා නිර්ලෝභිව මහත් උද්‍යෝගිමත්ව උපකාරිවු
බළලත් නිලධාරි I යු.ඩබ්.ඒ.ඩී ඉන්දික (ඇෆ්ගන් නොහොත් කඳිරා)
බළලත් නිලධාරි II කුයින්ටස් යු.ඒ.ඩී එච්.එස්.
බළලත් නිළධාරි II පෙරේරා ඕ.යු.එස්.
කෝප්‍රල් ගුණසේකර ජී.එම්. ද,
නම ප්‍රකාෂ කිරීමට අකමැති නමුත් මෙම ලිපිපෙලෙහි වැඳගත් කම අගයමින් තොරතුරු ලබා දෙමින් මාදිරිමත් කල නිළධාරී සෙසුනිල සියළු දෙනා හටද.
මේ ලිපියේ සහිත්‍ය රසය මතු කිරිමෙහිලා උපකාර කරමින් සහය දක්වන බන්දුල දසනායක සොයුරා මෙන්ම කරුනාරත්න සී.ඩබ්. සොයුරාට ද,
මුල් කවරය සකසා දුන් නෙත්මිණි කරුණාරත්න ආදරණිය දියණියටද මෙම ලිපිපෙල පළවන තුරු බලා සිට නොවරදවාම වචනයකින් හෝ මා දිරිමත් කරන අග්නි පාඨකයින් හට පුද කරමි.
මේ ලිපිපෙලෙහි කතෘත්වය හා අයිතිය මා සතු අතර, මේ ලිපියෙහි කොටස් මාගේ අවසරයකින් තොරව උපුටා ගැනිම තහනම් වන අතර, බොහෝ දුෂ්කර මේ ගවේෂනයේ ඇස නොගැටුන හෝ නිවැරදි කිරීමක් වේනම් සිත් රිදවා නොගෙන එය නිවැරදි කිරිමට පහත මාගේ දුරකථන අංක අමතා එය නිවැරදි කිරිමට සහය වන මෙන් කරුනාවෙන් ඉල්ලා සිටිමි.
☎ 0773378256
0712232491
Whatsapp 0773378256
එල්.අර්‍.ආර්.පී කන්ඩායම් පැරණි චායාරූප ඔබ සතුනම් මාවෙත යොමු කරන්න. ස්තුතියි
ඔබ මේ ලිපිය කියවා රසවිඳ යම් සතුටක් දැනුමක්‌ ලැබුවානම් මගේ අග්නි නම් පිටුව වෙත ලයික් කර මා දිරිමත් කිරිමටත් ඔබේ වටිනා අදහස් එහි ලිය එවන මෙන් ගෞරවයෙන් ඉල්ලා සිටිමි
.jpg)
.jpg)